Estaya de publicaciones n'asturianu, dedicaes a la nuesa cultura y tradiciones. Cola collaboración de Xuan Miyar

POR QUÉ 

Son les cinco y media de la tardi y como toles tardes llega Enrique de la escuela, esta vez llega bien apuráu pa entrugar una cosa a la so madre, y nun ye pola fame, que nin va entrugar qué merienda comu tien el vezu y fai tolos díes namás llegar.

Güei l'alderique de los neños al tornar de la escuela foi comu la d'un día cualquiera, los neños grandes a veces abusen, otres, deprenden a los pequeños, robándo-yos en dellos casos la inocencia, al mesmu tiempu que se rin d'éllos.

Enrique quier resolver una dulda nueva. Acabante llegar, ensin enantes dicir nada, namás que la ve, llama.  

- ¡Mama, mama!, que diz Neto que los Reis son los padres, dímelo tú, ¿Ye verdá?

- ¿Tú qué dixisti?

-Yo dixi que non, que yo nun tengo padre, que namás tengo madre y que  me trayeren delles coses. Depués pregunté-ylo a Ramonín, que nun paraba de rir, díxome que tamién lo oyera él, peru que yo paecía un pocu fatu.

-Bueno, nun t'esmuelas nin-yos fagas casu, pal añu que vien escribi la carta igual, y yá veremos, si vienen...

- ¿Sí, pero por qué diz Ramonín que paezo fatu? Voi escribíla comu esti añu, porque a min siempres me lo traen, y tamién voi pidir dalgo pa tí, qu'a otres madres tamién-y lo traen; mama, ¿A tí nun te trayeren nada porque nun te lo pidí?

La madre, comu tolos díes afalágalu y da-y la merienda preparada.

Yá pasaren dos meses dende les navidaes y que paseren los Reis. Nun ye la primer vez que'l rapaz vien coles preguntes y duldes, ta a piques de razonar anque ye bien inocente, pero defiéndese bien pa lo que-y interesa y nun lo quier creyer, piensa la madre, pa los ocho años que tien.

Mandó-y facer dalgo pa entretenelu y pa quita-y la dulda de la cabeza, la madre nun quier desengañalu, yá lo deprenderá él. Ye lo que tien en casa, y dase cuenta que'l neñu antaina a medrar más de lo quier.

-Riquín, anda, garra'l cestu carreteru y vete a llevalu a casa la to güela mientres meriendes, tate un pocu ellí con éllos y depués vienes a facer los deleres.

Enrique siempres, bien mandáu, garra'l cestu faxineru y llarga allegre, coles duldes escaecíes, pa ca los güelos, va contentu, la güela ye bona cocinera y siempres tien dalgo pal nietu, esa sorpresa, la llambionada nueva alguardándolu que-y presta, Enrique sábelo, que tien n'alacena siempres dalgo guardáu, llambionaes esperando pel nietu, anque la güela piensa que tenía de venir más amenudu.

Siempres esperando, siempres preparando cola mesma idea y la mesma dulda na cabeza, mientres van ocupando'l tiempu col qué facer hasta que llega'l momentu de la esperanza. Yá ye tardiquina, la hora de que venga y ta faciéndose tardi, paez-yos que güei tampocu.

Enrique lleva nuna mano'l cachu pan con mantega y zucre, esti día tocó lo que más-y presta, na otra mano lleva'l cestu carreteru, cásique va arrastrándolu pel suelu.

Al pasar per casa Jovito, él, que cásique nunca nun ve a nadie desa casa, y pa él indiferente, ensin dengún interés, emperu, dende dientro venlu venir, y sal la muyer, tán avezaos a velu pasar ensin dici-y nada, naguando, yá teníen gana paralu pa velu de cerca y falar con él.

- Enrique, ¿Vas pa casa los tos güelos?

- Si, voi a lleva-yos esti cestu.

 - ¿Quiés pasar?, entra anda, y garra unes galletines pa cuando acabes la merienda, ¿Gústate'l chicolate?

Acabante de comer la merienda, nun-y vino mal garrar la llambionada y garra percontentu too lo que-y dan, mientres lu miren de cerca y falen mui candiales con él.

Jovito y María mírenlu ensin dengún recelu, pa éllos, ye la ayalga descuidada, ensin entruga-y nada, namás miralu, venlu cerquina pa cumplir los sos deseos, falen despacín mientres Enrique nun perdía detalles de too lo qu'hai nesa casa, la primer vez qu'entraba; col bon oyíu d'Enrique foi quién oyer lo que despacín se dicíen. Depués de comer les llambionaes, ensin nin siquiera dar les gracias, diz que va pa casa los güelos. Jovito y María mírense y mírenlu colos güeyos bien abiertos.

-Para a merendar otru día cuándo quieras, anda...

Estrañáu y pensatible, siéntese raru d'entrar na casa onde siempres lu inoraren y se guardaben cuando pasaba, y sigue andando pel camín pa casa los güelos.

Los güelos yá metíos en casa, viendo pasar el mundo del que s'alcuerden y conocieren. Ensin cuntar yá con él, lleven la sorpresa de ver llegar al so nietu. Coles sos cares illuminaes anoven la ilusión del día, cásique perdía.

         -Home Riquín, pensé que güei yá nun veníes tampocu, ¿Merendasti?

         -Fízoma mama pan con mantega, y en casa Jovito diérenme galletes y chicolate.

         - ¿Jovito? parasti en ca Jovito?

         -Meca, dexé... ¡Dexé ellí'l faxineru!

Enrique, ensin dicir mas nada, arranca corriendo a tou meter pol cestu carreteru, ensin ver a naide pela caleya, llega a la casa Jovito-y garra'l cestu, que taba afuera, da la vuelta pa casa los güelos.

Mírenlu, pálpenlu, quieren da-y de too, qu'escueya, pero diz que yá nun tien fame, que lo lleva pa merendar mañana.

Confiésenlu, tán esmolíos pola so parada en casa Jovito.

- ¿Qué te dixeren, qué t'entrugaron, qué te dieren en ca Jovito?

-Entrugárenme si foi a la escuela, dixeren que yá toi mui grande y que si yá ayudo a los güelos, que coma bien, qu'enseguida voi ser mozu. 

Después de miralu, fala-y, mimalu y afalagalu, pa éllos ye un cachín del cielu, quedóse ellí un pocu falando, comu-y mandó la madre. Pa éllos foi'l momentu del día, de los díes. Riquín siéntese afalagáu polos güelos, sabe que lu quieren, y él a éllos y sabe que tamién ye la casa dél, asina-y lo facen ver.

Despídese hasta mañana, déxase abrazar, o hasta otru día y torna pa la so casa.

- ¿Qué tal los tos güelos?

- Queríen dame de merendar, pero yá-yos dixi que me lo disti tú y que me dieren en ca Jovito galletes y chicolate.

- ¿Parasti en ca Jovito, llamárente y falasti con éllos?

- Si, mandárenme entrar y acabé de merendar ellí y diérenme chicolate y galletes, mirábenme muncho y ¿Sabes qué?, a veces falaben despacín ente éllos dos pa que nun los oyera, ... pero oyíalos. Dixo Jovito a María -Ye calcáu, nun lu puede negar. - ¿Qué ye calcáu, mama?

- ¿Y... qué-y dixo María?

- Nada, metió-y col codu, ensin dicir nada... ¿Por qué?

         - ¿Taba Vitín perhí?

         - Marchó cuando llegué, nunca nun me diz nada.

La lluz de la tardi yá s'escapaba pela ventana, mentantu que la so cara depués d'oyer a Riquín, quedó cartiada comu una  gadaña, y yá coles dificultaes superaes, ta nos tiempos de la sabiduría xusta, y ganada.

- ¿Masuñárente?

- María garróme un pocu pa escontra d'ella, si...

- Anda, vete quitar esi xersé... y llévalu pal llavaderu.

XUAN MIYAR