“La Casa´l Monte

Dende neños nunca nun entendieren como yera que vivíen ellí, tol día metios na so casa 

atizando’l llar y vistios con galdrapos. Cuéntense hestories que les sos mentes de neños

fabulen, paecen máxiques y enllenes de misteriu y suañen, nagüen per dir a la casa,

emperu tienen miéu…

Ta la casa metía nel monte y pa llegar, hai que dir por caleyes cuestes y bien zarraes con

sebes y árboles, hai que tar yá bien cerquina pa vela. La casuca ye mui pequena y asitiada

nun oteru y tamién rodiada d´árboles, dende ellí vese tola vega y l´aldea.

Xuntáronse dellos rapazos y entamen a dir a golifar, cuando s´averen a esa casa mui

callandinos, van escondiellándose amirando qu´hai pela contorna faciendo un exerciciu

d´arremangu no más fonderu y cagaos de miéu.

Güei Ricardín ta picando lleña. Ricardín ye mozu, sal pocu de casa, baxa a l´aldea de

xemes en cuando, namás que pa dir al molín, cuantu misteriu, apenes semen ná na so

güerta, namás tienen dos vaques ruines y la burra. ¿Entós, qué maíz lleva Ricardín al

molín ?.

Cuando xubín pela cuestona cuenta-yos Pepe a los rapaces que pola nueche anden peles

aldees y camuden de pueblu en pueblu, unes vegaes baxen al de so y tienen vezu de dir

col diantre, qu´écha-yos un gabitu pa traer la comida.

-Nun metas miéu, entós yo nun voi, torna pa casa-, dixo Nel.

-Pepe, nun cuentes bobaes, yo polo menos nun lo creo, diz Andrés-.

-Cuntáronlo na esbilla, tamién cuntaron que la vieya fai maxa y trae la bona suerte-.

-Home, lo bona suerte, la bona suerte… entós que la garren pa ellos-.

-Que si, que delles veces vien xente y fai daqué pa trae-yos lo bona suerte-.

- ¿Hai dalgún que s´atreva entrugar a Ricardín? -.

-Entrugo-y yo si vamos toos-, diz Pepe.

N’esto, sal de casa una muyer.

-Guardaivos, guardaivos-

Conócenla, ye Sabel, una moza del so pueblu.

Entainen a guardase, enñérense tres la sebe, la moza caleya lixerina y al pasar perende

siente dalgo que ruxe na sebe, esmuélse, tien miéu y cuerre a tou meter que pierde’l

culo.

Sabel yá nun sabe que facer, busca y nun alcuentra remediu al so mal, t´aburría de la

vida, dixeron-y que fuera a ver a Segunda, de xuru que-y camuda la suerte.

Sabel mira´l cielu, ¿qu´hai lloñe?, una lluz de esperanza da l´aire dacuando-y pega na

cara, emperu´l golor de la soledá amosa-y duldes y torna al silenciu.

Entós trabaya y cabilga. Xuan, el mozu que-y presta nun-y fai casu, el que-y diz cosines,

a élla nun-y gusta muncho, los pas tampoco la dexen dir a la ciudá…

Agora agárrase a lo que seya col sen de camudar la so suerte, entamó dir a la casa´l

monte. Nun conoz a Segunda, depués de pensalo muncho arremángase pa dir vela pa

que-y de sofitu a les sos penes.

Depués del sustu la caleya, baxa pala so casa. Miráu dende equí que guapu ye´l mio

pueblu. Sabel ta contenta y enfotada que va camudar la so suerte…

Los tres neños anden drechos pala antoxana onde Ricardín pica unos garabinos de lleña.

Asústase cuando los ve llegar y dexa de picar, espeta l´hachu nel picaderu, quédase

mirando pa ellos ensín dicir ná.

-Hola Ricardo, ¿tas picando lleña pa to ma?, hai qu´escalecese atizando´l llar- diz Pepe.

-Si, mandómelo mio ma-.

-Llargó Sabel, ¿vieno a ver a to ma? -.

Ricardo asiente cola cabeza, ye de poques pallabres y entovía ta confundíu.

Los guah.es siguen col plan, quieren ver a so ma, entamen la manera d´entrar na casa.

- ¿Garro los gárabos pa metelos na casa?, diz Pepe.

-Si quies garra un brazáu, ponlo xunto´l llar-.

Pepe y Nel garren un pocu caún, mentantu Andrés va mirar per dientro.

Entren na casa cola lleña y Ricardín tres d´éllos.

-Poneilo ehí onde lo otro-, diz Ricardín.

So ma entá nun torció la cabeza, paez que ta sentada nun tayuelu xunto´l llar, les sayes

bien negres y arrastrando pel suelu, nun vese´l tayuelu. Una pota nes trebades y

Segunda ta col ganchu na mano xorrascando´l fuéu.

-Mira quien vino vete ma-, diz Ricardo a voces.

Fasta que nun torció la cabeza nun-y vieron la cara, cola pañoleta negra que nun se-y ve

namás que dacuando mira de frente.

Paez más vieya de lo que ye, ta sorda comu un topu y fala a voces…

Los neños ponen la lleña enriba l´otro y entruguen si traen más, mentantu qu´Andrés

nun pierde´l tiempu mirándolo too.

-De quien soes-, entruga Segunda.

-Home, a los vuestros pas conózolos yo-.

Enriba la mesa hai una fardela con maíz, tres la puerta ta una pita caldiando güevos y

forgaxes y garabinos tiraos pel suelu, un calderu colgáu nes calamilleres y otru nel suelu

col canxilón dientro, tamién hai cacharros p´enriba la masera y el xarru l´agua. Namás

hai un ventanu pequenu y una puerta a un lláu.

Andrés repara nel ventanucu, ta mui baxu y queda paráu, enxamás debió abrise, el

cristal enllenu de telarañes y cuasique nun hai onde poner más coses. Cuantu misteriu.

Allégase pa mirar curiosu, tien qu´arremellar bien los güeyos, míralo too pa nun escaecer

ná y cuntalo depués a los sos collacios: una palmatoria cola vela gorda, una botellina

cola vela delgaína metía nel bocal, una botella a la metá de tinta azul-prietu, un tinteru

de cristal cuadráu cola pluma de gallu blancu pergrande dientro y el cuernu, el cuernu

de carneru vieyu bien gordu, retorcíu y bien puercu, d´un collor ocre escuru.

Andrés ta ellí plantáu ensín dicir ná, Nel y Pepe reparen no qu´amira y quédense tamién

paraos, diéronse cuenta l´arniu qu´ellí se alendaba…

Mirándose dan vuelta con disimulu y ensín mirar a Segunda crucien la puerta casa,

afuera ta Ricardín.

Segunda, que sal tres d´éllos, yá ta na puerta casa tamién.

- ¿Marchaes?, tornai otru día-, diz Ricardín.

-Ricardo, dayos una galleta, esperái un pocu rapaces-, diz Segunda.

-Non, non, nun-mos gusten les galletes, ta otru día-, diz Pepe.

Nun dixeron más y tornen pal pueblu ensín atrevese a entrugar.

-Pepe, nun entrugasti pa qué ye´l cuernu-, dixo Nel.

-Que sé yo, ¿pa qué ye la pluma y el tinteru, nun escriben col llapiceru? - .

Baxen la caleya pal pueblu, falen de too, que si Ricardín t´afatáu, la vieya qué rara ye,

qu´escura ta la casa y de too lo qu´hai nel ventanu.

-A min paezme qu´esa muyer tien más cara de bruxa que d´otra cosa-, diz Andres.

-Nin bruxa nin ná, ye una muyer porcona que-y presta caldiar la barriga nel llar-, dixo

Nel.

Sabel xube de la fonte col calderu na cabeza, yá sabe que Ramón ta nel práu de la vega

col so pá cargardo´l carru de pación, violu cuando baxaba.

Ramón ye mui trabayador, sinón fuera tan pesaín el probe… que si qué guapina yes, que

si préstame oíte cantar, que manines tienes, que si me gusta dalgún mozu, nun fai más

qu’entrugar.

Dende´l práu Ramón nun ve más que´l calderu p´enriba´l matu, allégase y ximielga cola

traente la sebe, Sabel nun fai nin casu, son les coses de Ramón.

Cuando pasa la sebe yá ta Ramón a la vera´l camín.

-Que contenta andes, prestome oíte cantar, esi cantar ye nuevu, nunca nun lu sentí

enantes-.

- ¿Vas tornar a la fonte?, torna lluéu, llevote yo´l calderu-.

-Home, col calderu entovia pueo, nun t´esmuelas, llévolu yo-

Ensín parar, Sabel caleya pa casa cola idea de tornar.

Ramón y so pá siguen cola llabor, el pá diose cuenta de la chancia de Ramón.

- Que guapina ye Sabel, ¿e Ramón? -.

-Si oh, perguapa, paezme un pocu fadia, ná que-y dices y ponse remilgosa-.

-Bono, siente que-y faces muncho casu, ponte fadiu tú tamién, entós va tratate con

procuro-.

-Mira, lo que ties que facer ye falar col so pá, dii que si pués dir dalgún día pela nueche

a char la partía-.

Yá ta peslláu, pica, abre la puerta Amador.

-Pensástilo muncho, pensé que yá nun veníes-

Entren pala cocina, acabante cenar, les muyeres tan fregando los cacharros, Sabel

qu´había sentíu a Ramón, nun dase la vuelta a mirar.

-Esperái un pocu qu´acabe la radio-, diz la ma.

Taben oyendo “L´Inpector Robert”, nun lu perdín por ná, taben comu a misa.

Acabante´l serial entamen xugar, Ramón nun mira a Sabel, Sabel mira un par de veces

de regüeyu y cabilga… que raru ta güei Ramón.

Depués de char la partía queden pa xugar otru día.

Torna l´amargor a la cara de Sabel, echa sospiros de tristura, pela tardi ve llárimes del

sol, agora espera pa ver les de la lluna.

So ma afalágala, caltién-y la esperanza.

-Caleya Sabel, mira´l verde de la viesca, mira l´ocre nes espigues, güei guiarate un

paxarín y maxinarás un mundiu de allegría, llucirá´l sol tol día-.

Sabel comu da vezu, torna colos calderos d´agua de la fonte caleyando con procuro.

Ramón que la taba curiando, sal al so alcuentru, ensín dicir ná baxa de la so cabeza´l

calderu.

¿Sentámonos ehí?, ¿falamos un pocu? -.

Nun hai soledá si dalguién me fala al oídu, nin tristura cola esperanza dorada, nin males

que ximielguen les solombres qu´hai na mio alma.

XUAN MIYAR