El Serviciu de Normalización Llingüística de la Comarca de la Sidra convoca pa esti primer semestre del añu dos nuevos talleres d'afondamientu llingüísticu en Nava y Villaviciosa.

El primer d'ellos, Taller d'asturianu oral, impartiráse nel aula de servicios sociales de la villa sidrera, na cai Luis Armiñán 6, los martes de 18:00 a 20:00, en sesiones quincenales dende'l 4 de febreru al 20 de mayu, y va tar dedicáu a la espresión falada y la conversación, permitiendo a les persones participantes meyorar dende una perspectiva lúdica les habilidaes espresives y arriquecer el vocabulariu sobre les más diverses temátiques.

Pela so parte, en Villaviciosa vuelve a convocase un añu más el Taller d'escritura creativa y práctica, centráu na espresión escrita y na creatividá lliteraria na llingua de Marirreguera, destináu a persones que, aparte de disfrutar de la lliteratura y la escritura, tengan interés en meyorar el so nivel llingüísticu y ortográficu. Esti taller d'escritura n'asturianu va tener llugar na Casa de Los Hevia de la capital maliaya, col mesmu horariu que'l de Nava, de 18:00 a 20:00, en martes alternos, dende el 11 de febreru nesti casu.

La inscripción nos talleres ye dafechu de baldre y pue realizase contactando col Serviciu de Normalización Llingüística de la Comarca de La Sidra a traviés del corréu normastur@lacomarcadelasidra.com o, n'horariu de mañanes, pel teléfonu 985 71 84 13.