Estaya de publicaciones n'asturianu, dedicaes a la nuesa cultura y tradiciones. Cola collaboración de Xuan Miyar 

“EL SOMBRERU”

Perhí van, pasiando pela cerona comu tantes veces, alcontrando'l llugar perfeutu p'alendar que-yos enanche los pulmones, p'andar a veces, cola cabeza gacha mirando pa los nuestros adientros a la gueta de la paz y del silenciu ganáu a la vida cotidiana, colos deleres y los sos menesteres.

Tornando direicción pa la Casa'l Conceyu tuerce'l piscuezu pal Parque la Ballina, atopa les mazanines. Tolos bancos acutaos al rodiu  p'aselar y aldericar.  ¿Qu'hai tres el sombreru?.

Carrió, blanquina, coloradona y roxina... rescamplen col brillu llimpiu  y relluciente.  Mazana pañada pa enseñala y fotiala, sentase y retratase pa saca-yos el brillu cola culera poniendo una sorrisa na cara, coles mazanes d'esa Villaviciosa cimera, que facen maxa.

Ellí tán sollertes, miren de regüeyu y güelen, danse col codu viendo pasar los turistes y, el tiempu, que tantu calla y tantu fala.

Coles sos alcordances infinites de la Villaviciosa hermosa y, que tantu sienten, algamaes nes solombres fonderes nel Parque la Ballina, nesos bancos enllenos d'homes enteros, con hestories cuntaes y otres  tantes guardaes y faciendo remiendos nos corazones con alma d'aneyu galloleru, poro, cola aguya torcía... d'albarderu.

Alderiques superficiales, retruques intrescendentes y saboriando hestories repitíes y vieyes, cómu l'alimentu de los cuerpos  gastaos y les mentes, entá abiertes... y ven pasar un rapazón escorriendo a los ñeños màs pequenos, faciéndolos suañar nel futuru, n'un futuru ónde la rueda del carru nun roda penriba les llábanes llabraes pola rodada.

Raxao, perico, prieta y regona.¿Qu'hai tres el sombreru?.

Un rayín de lluz que s'adiéntra pente la solombra pel parque, foi cómu un mordigañu de frescura naquella mazana dorada, aliviando les fatigues d'ún y la sede de los llombos aventaos, y de sudu esgolando pela cara sonsuañando llárimes de los enfotos amenorgaos y cola boca pequena, compartiendo secretos,  sabiendo ser y deprendiendo tar.

Nun manca l'arguyu, manca'l sudu, les reñonaes, el trabayu y l'esfuerzu inútil ya escuru de dimir y esmenar. -¿Qué, prestaríate volver a ser mozu?. -Si ho, y mayar y apretar, mirar el filu sidra cayer nel duernu, de bona gana facía una mayada, y garrar en xineru una panerina del horru, o una mingana.

Vivir de nueves la realidá pasada pa nun escaecer, nun dexar nel olvidu lo que m'esmuele, l'abandonu y l'arfueyu, pa vivir y narrar momentos de la vida, la que va gastada. ¿Qu'hai tres el sombreru?.

Cada casa tien una historia y queremos facela cuentu, enantes d'escaecelu, cuéntamelu. Hestories nun cuntaes y d'amor polo nuestru. Esi sombreru ta fechu pa equí, pa ónde quería, amás de la merecía dedicatoria, traxo les mazanes rodando pel camín afayáu de l'ayalga maliaya.

Gracies Úrculo, nós con arguyu, vamos quitar el sombreru.

XUAN MIYAR