El acto cultural contó con la presentación del periodista y escritor maliayés, Lluis Portal. Hoy os ponemos su intervención, y continuaremos con la conferencia de Xuan Pedrayes

Presentación de Lluis Portal

Buenes tardes

            Estos dis celebróse la Selmana de les Lletres Asturianes, qu'engloba esti actu de Xuan Pedrayes Obaya sobre 'L'entamu históricu del espaciu astur: del castru a la villa/aldea del sieglu XI'. Esta ye la primer entrega d'una serie de charres mensuales alredor d'estremaos y interesantes temes de la realidá asturiana, así como la presentación de llibros que pretende facer l'asociación bablista El Ronchel, del que formamos parte, que desarrolló nos últimos meses un más que satisfactoriu 'Cursín d'asturianu' al que pretende dase-y un nivel superior prósimamente. Y tou ello a través del áula, recién creada, que lleva por nombre el de 'Carlos de la Concha'.

            La figura señera de Carlos de la Concha cumple una doble función: trátase d'un conocíu escritor bablista maliayu que nos presta reivindicar (recordar ente otros 'Ensueños y azorances" (1923) con prólogu del rector de la Universidá Fermín Canella, les collaboraciones nel importante llibru -recordatoriu de la 'Fiesta de la poesía asturiana' qu'hubo nel Teatru Xovellanos de Xixón en 1923- 'Los nuevos bablistas' d'Enrique Gª Rendueles que sasoleyó en 1925; dos años antes publicó 'Sueños d'un asturianu n'América' y en 1953 publica los 'Cuentos perreros'. Amás, De la Concha fue fundador del Atenéu Obreru de Villaviciosa, dinámica entidá que nos acueye nesta singladura, amás de la Fundación Cardín que nos aporta la so sede amablemente.

            Queremos nesti momentu facer un recordatoriu a Mundo Collada que fue Presidente de la entidá ateneína, en cuyos estatutos el bable goza d'una situación de privilexu que bien se podría equiparar notres instituciones asturianes de más altu vuelu. Collada desarrolló una intensa actividá en favor del asturianu fundamentalmente dende l'asociación y el periódicu 'Albentestate' nos años 80 y 90.

            Nos prósimos meses saldrá tamién a la lluz el tercer llibru de l'asociación sobre la vida y obra de Ramón Rivero, del que ye autor Miguel González Pereda. Rivero, como casi que todos los autores maliayos desde fai 300 años acá, escribe en bable, con mayor o menor intensidá, ente otres coses nes dances del 'Cu-cu' y de 'San Xuan d'Amandi' y n'obres de teatru con desigual calidá.

            Pero munchos faenlo seriamente, como en cualquier otru idioma, por exemplu Bruno Fernández Cepeda, Caveda y Nava, Francisco Balbín de Villaverde, 'Tuxa' Villaverde, etc. Y más recientemente hai que sumar l'abadesa de Les Clarises María Luisa Picado que ye autora d'una serie de poemes -en bable, claro- de temática relixosa seria.

            Un d'estos autores ye Xuan Pedrayes, un ilustráu de fondos y diversos conocimientos, d'impactante concreción; trata de cuestiones de La Villa que se remonten a la pocu tratada fundación de la ciudá, al por qué d'esa fundación, a los castiellos altumediavales qu'escoltaben o controlaben a Maliayo, o los más antiguos poblaos -abundantes poblaos astures por ciertu- de varies centuries anteriores a Cristo y del que va a falar güei.

            Pero esa preocupación poles coses fundamentales de los nuestros oríxenes como pueblu, nun eviten otres preocupaciones que nun esmuelen a casi naide como ye'l mundu de los horros, pero tratao tou ello con una esquisitez y un altísimu nivel de conocimientu, por que hasta pa falar del horru se precisen conocimientos fondos de la historia común. Así, escribió'l 'alter ego' de Pedrayes, Mino Cifuentes, nel llibru 'Villaviciosa, una mirada' publicada hai unos meses por Cubera.

            "Nes aldees y quintanes un obxetu unánime destaca ente los demás: l'horru. A diferencia con Galicia, n'Asturies l'horru nun ye una costrucción adxetiva. Dende l'aparición de la quintana nel sieglu V, el llar, la corrada y l'horru igüen l'ecosistema aldeanu".

            Mui na llinia d'Otega y Gasset que define l'horru como

            "El hórreo, menudo templo, tosco, arcaico, de una religión muy vieja, donde lo fuera todo el dios que asegura las cosechas".

            Evidentemente a esti nivel nun llega'l paisano que pide a Dios que caiga l'horru centenariu pa facer un aparcamientu. Pero tamien hai dalgún escoyíu marqués esperando que caiga una soberbia panera del 1.700. Pedrayes asombra coles sos idees revolucionaries, por exemplu cuando diz que'l pegoyu ye la cuarta columna dempués del dóricu, xónicu y corintiu. Esta claro que Pedrayes escandaliza a propios y estraños coles sos propuestes, por mui razonanbles qu'estes sean. Estes propuestes atópense en artículos como 'El estilo Villaviciosa' o 'El quintu orde y la ciudá de los horros'.

            'Villaviciosa de Asturias. Análisis urbano'' ye una obra única fecha con rigor sobre´l desarrollu urbanu de la Villa. Hai montones de trabayos suyos sobre esti y otros temes en distintes revistes como Cubera. Ye fundamental saber la forma de construcción de los palacios y les cases, el papel de la muralla medieval con pintures y dibuxos del propiu autor; o'l porqué de la ubicación de La Villa a cásique10 kmde la mar. Equí nesti llibru dase-y, per primera vez, salida a esta y otres preguntes fundamentales padir iguando la historia de La Villa.                    

            'Suncia la bastaranga' ye una obra xuvenil cola mar como fondu, amás de cuentos colos que ganó más d'un premiu. Xuan posee una perbona biblioteca, qu'en parte perteneció a la colección del illustráu Caveda y Nava, lo cual dexa a les clares les inclinaciones illustraes de Pedrayes.

            Va a hablar del pasu del castru a l'aldea nel sieglu XI. La importancia de los castros resulta fundamental, nesta parte d'Asturies sobre tou, pa conocer meyor la implantación de les gens astures. Hai quien piensa que la historia nuestra entama cola llegada de los romanos, nada más falso pero sin embargu interensao. La fuerte resistencia a la invasión romana de los astures y los cántabros durante venti años ye muestra d'un poder y d'una capacidá bélica que solu s'esplica na so organización.

            El historiador xixonés Luis Suárez Fernández -que tuvo na Villa nel ciclu conferencies sobre Carlos I, del que ye espertu-, rector que fue la Universidá de Valladolid, miembru de la Real Academia de la Historia, y espertu na Baxa Edá Media, escribe un llibru que se titula 'Reflexiones sobre la Historia de Gijón', con prólogu del entonces alcalde Vicente Álvarez Areces y el periodista Francisco Carantoña, y diz na primera fueya del llibru lo siguiente, con evidente intención política que lleva a establecer una historia racista contra la población prerromana, dalgo difícil de defender nun llibru d'historia; sobre tou cuando los arqueólogos tienen munchu campu por facer:

            "Ni siquiera sabemos qué entendemos bajo el nombre de astures. Estrabón y Pomponio Mela se creyeron obligados a explicar que los nombres que los astures empleaban para nombrar personas y cosas eran tan enrevesados que ellos se confesaban incapaces de pronunciarlos". Claro yera un idioma que nun conocín y que nun provenía, obviamente, del llatín, y continúa: "Juan Uría, midiendo cráneos de remotos difuntos, llegó a establecer nada menos que ocho modelos antropológicos diferentes entre los astures, lo que es tanto como decir que en nuestra tierra aparece representanda todo tipo de estructuras óseas. En consecuencia, al referirnos a aquellos primitivos y toscos seres humanos, que deambulaban por las playas y rocas buscando mariscos y labraban la tierra -menos mal-, no podemos hablar de raza, ni de étnia y, mucho menos de cultura en una gente ágrafa; todo lo cual nos proporciona cierta tranquilidad, pues nos libera de algunos peligrosos fantasmas que aún acechan, con sus viejos odios, por los rincones de Europa".   

            Nun merez la pena comentalo.

            Bueno, déxo-y pasu a Xuan Pedrayes.

            Munches gracies.

Lluis Portal