El director xeneral de Política Llingüística y Normalización, Fernando Padilla, presentó en Villaviciosa la VII Xunta d'Escritores Asturianos, que se cellebra na villa maliaya esta fin de selmana, 28 y 29 d'ochobre. Padilla, que tuvo acompañáupol alcalde de Villaviciosa, Alejandro Vega, destacó la necesidá d'esti alcuentru, tres de 13 años en sin convocase depués del postreru d'estes característiques, celebráu en Llanes nel 2004. Al cumplise 30 años dende la primera Xunta d'Escritores, qu'acoyó Villamayor, la Conseyería d'Educación y Cultura y el Conceyu de Villaviciosa decidieron entamar un alcuentru nuevu que, col títulu de Lliteratura Asturiana Presente, quier poner al día la situación de les lletres asturianes, al empar que reivindicar la so presencia na sociedá. Esta nun ye la primer vez que Villaviciosa la Xunta d'Escritores se cellebra en Villaviciosa, que yá acoyó allá pel 1996 la cuarta edición de la mesma.

Fueron diez les meses de debate que se celebraron dende la mañana del sábado hasta'l mediudía del domingu nos dos escenarios escoyíos pa la ocasión: el Teatru Riera y la Casa de los Hevia. 54 autores participaron nestes meses onde trataron asuntos como'l presente de la lliteratura asturiana, el relevu xeneracional polos escritores más mozos, la traducción d'otres llingües al asturianu, el papel de los medios de comunicación, la importancia de la lliteratura infantil y xuvenil, la salú de la crítica, la difusión y normalización de la producción cultural, la situación actual de la novela y la visión que de la nuestra lliteratura se tien fuera d'Asturies.

PIE DE FOTO: Homenaxe a Xosé Caveda y Nava, en la Casa Natal, Cai del Agua, Villaviciosa 

Amás d'un actu d'homenaxe a Xosé Caveda y Nava, que se llevó a cabu a les puertes de la so casa natal,  presentose'l documental Escribiendo'l camín, 30 años de xuntes d'escritores asturianos y una revista conmemorativa que  axunta una muestra de los autores más mozos y un númberu nuevu especial de la revista Friúz, editada pola asociación maliaya de defensa del idioma 'La compaña del Ronchel'. Como material de reflexón, diose a los participantes un llibru coles aportaciones crítiques de dellos especialistes que dan la so opinión de los aspectos más relevantes de la lliteratura escrita n'asturianu. Asina mesmo agasayose a los asistentes con un númberu nuevu de Trabatel. Revista eonaviega de lliteratura.

Más d'un centenar d'escritores  asistieron a la VII Xunta, a la que tamién llegaron persones que formen parte de la cadena del llibru y qu'intervienen na promoción de la lliteratura asturiana, como periodistes, críticos, técnicos de los servicios de normalización municipal, representantes d'instituciones, editores, llibreros, etc.

 VER Folleto del Programa Xunta Escritores

https://goo.gl/FyrgJp

Calca l'enllace baxeru pa ver les semeyes

https://photos.app.goo.gl/oT5xfOZH7FuXLBIw2