N’esta semeya, Tere Valle de la Panadería La Portalina de La Villa entregando lletres a Pilar Solano y Eloina Velasco, en  presencia de  Marga Solares y Miguel González Pereda, de la   asociación “La Compaña del Ronchel”, 

El Serviciu de Normalización Llingüística de Man.Co.Si, en xunto cola asociación “La Compaña del Ronchel”, de Villaviciosa,  entamó otra vuelta’l repartu de lletres de pan pa conmemorar el Día de les Lletres Asturianes.

  Esta iniciativa entamóla nel añu 2004 l’asociación maliaya “La Compaña del Ronchel”, pal ámbitu del conceyu de Villaviciosa, y desde va tiempu encárgase d’ella’l Serviciu de Normalización llingüística de la Comarca de la Sidra, ampliandola a los seis conceyos que formen la Mancomunidá y cola ayuda de la conseyería de Cultura y Turismu.

         Ye una actuación que vien contando con gran aceptación desde’l so entamu y a la que se pretende da-y continuidá, como forma de promoción del día de les lletres asturianes a nivel comarcal, y de revalorización de la nuestra historia lliteraria.

          Esti añu, les lletres van a homenaxar a Antón Balvidares Argüelles, autor ilustráu nacíu nel conceyu de Sariegu, al que la conseyería dedica esti añu la Selmana de les Lletres.

          Les lletres de pan, acompañaes por un poema y una breve reseña biográfica de de Balvidares, repartiénrose per escueles, institutos, cases de cultura, ayuntamientos y chigres de los seis conceyos qu’integren la comarca, polo que l’acción tendrá un impactu social apreciable y la nuestra lliteratura tendrá un nivel de difusión nesti día muncho más altu del acostumáu.