“Cantábrico”-    Xuan Miyar

 

Pasión pela tierra qu´habitamos, xente del pueblu qu´esploren a la vera la mar  agüeyando´l bravor del agua afalador, foles d´agua acelerao qu´alcuentra llastres, faciendo regodones cada vuelta más redondos y más pequenos. Pedreros arrequexaos peles marees ansioses, abeyugos de páxaros, d´homes y de muyeres a la gueta la calma, colos güeyos bien abiertos y la borrina metía nel alma.

 

Cantábrico que dibuxes el llitoral cola navaya afilada, ficisti de puerta pela qu´entraren cultures, pueblos invasores, náufragos y reis. Cantábrico, coles puertes y ventanes abiertes peles qu´escaparon suaños a borbotones. Yes l´horizonte de los suaños afogaos que llevó l´aire lloñe metíos nos nubarrones. Dístimos aliendu dende´l to balcón y a veces solana onde miramos na llongura ensin ver el llinderu, cola fondera imaxinación reflexao nel to espeyu.

 

Ente´l cordal y la mar, ente la mariña y les estrelles onde tan los collacios de la mar. Centineles de temporales, surcadores de foles, echadores de redes, piescadores de pexes. Cantábrico, yes el coleccionista de galernes, yes guerra col agua embrabecío, yes cementeriu de barquinos humildes y tamién d'armaes invencibles.

Pel camín escuru de la memoria, ensin olvidu, miramos con güeyos llambiones dende l´asomu les agües infinites. Quién fora páxaru y esñalar, esñalar y pingar llárimes pa que se mezan col agua. Llárimes de reconocimientu que-y debemos dende qu´íbamos arrascar piedres dende cuantayá y deprendímos a piescar y mos disti´l sustentu dende´l tiempu la fame.

 

Yes música col agua mansulino, yes acoyimientu nos arenales pa fundíse col espaciu y sintíse llibre cuando sintímos el to aire. Cantábrico, yes agua y espluma, yes pasión, yes sal, piedra y sable.

 

XUAN MIYAR