La Banda Gaites Villaviciosa–El Gaitero, entidá organizadora del Festival Internacional de la Gaita de Villaviciosa (FIG), quier dar anuncia de les feches de celebración del mesmu en 2024: va desendolcase ente los díes 5 y 8 de setiembre. Les mesmes yá tán apautaes col Ayuntamientu Villaviciosa, principal sofitu col que cuenta’l festival.

Dende la organización yá se ta trabayando na próxima edición –la decimoséptima– d’un festival que pali pali convirtióse nel más importante de tolos que se celebren al rodiu del nuestru instrumentu musical tradicional más significativu, la gaita, col enfotu de volver a iguar un programa d’actividaes lo más ampliu y atractivu posible. De fechu, la principal novedá qu’hai pel momentu ye que pa esti añu qu’entra nun solo cuenta col personal organizador de siempre, sinón que ta acabante d’incorporar de manera definitiva al so equipu de trabayu a xente venceyao al mundu de la música tradicional que yá venía andechando puntualmente, col enfotu de siguir medrando.

Y ye que’l FIG nun apara de crecer: en 2023 volvió a dar un reblagu importante en cuantu a cantidá y calidá de la programación y asistencia de públicu. Asina, nos cuatro díes de celebración, del 31 d’agostu al 3 de setiembre, pudimos asistir al niciu del festival, l’alcuentru de bandes de gaites –con grupos vinientes d’Asturies, Galicia, Castiella y Italia–, pero tamién a un conciertu d’entamu; una esposición sobre’l traxe tradicional asturianu; mercáu agroalimentariu y artesanu; nueche en danza; actuaciones de bandines de música tradicional pelos chigres; certame de tonada; concursu de gaita y una potente nueche folk na qu’actuaren los grupos Alienda, Project Smock, Llan de Cubel y Deira.

Nota de la Banda Gaites Villaviciosa–El Gaitero,