Estaya de publicaciones n'asturianu, dedicaes a la nuesa cultura y tradiciones. Cola collaboración de Xuan Miyar

“EL FERRERU”  

Cuántu trabayu-y costó llevantase, Manolo fízolo bien tempranu, baxó de la cama de rodielles y coles manes apoyaes na cama foi quién a ponese derechu, si derechu, lo más qu’él puede. Ye martes y comu tolos vienres, que tamién tien de facelo, toca’l llabor de ferrar. Yá tien l’avisu d’Antón el carreteru, que vien a ferrar los gües. A piques d’amanecer yá empiecen a llegar colos animales pa ferrar.

Amañanen pa garrar sitiu los que tienen  priesa y nun quieren perder tol día, y entrugar quién ye l’últimu, anque’l sitiu ye bono p’aconceyar y socializar y ellí vense de cuando en vez p’aldericar, y hasta facer tratos. Qué guapu ye pa éllos, dalgunos tómenlo cásique comu día de fiesta, poro, lo importante ye llegar tempranu, hasta p’amarrar l’animal hai que llegar a tiempu, sinón alcuentren sitiu, a veces hai que tenelos pastiando garraos pel ramal a la vera del camín, a veces espeten una estaca y amárrenlos ellí, o amárrenlos al cañu d’aquel salgar.

Pa Manolo ye otra cosa, abre la puerte y sal de casa p’atopase col día murniu, escuru, siempres mirando al suelu, día duru de trabayu y d’esmolición pa poder finar el día, nin tiempu va tener pa comer y cavilgando, si sedrá pa éllo. Ello ye, que ve la cosa col afoguín que-y espera, escoyóse, cuántu ganáu, burros y los gües d’Antón. Lo meyor pa principiar el día foi, depués del café, un bon lligotazu de coñá bien llargu p’animar esti día de trabayu. Nun-y da tiempu nin calentar, pa principiar, un güe que tien de xubir pal potru. Cola so espalda curciada, avezada a tar doblada pola postura del so trabayu. El güe, yá dientro del potru tien de llevantalu, lo primero, uncilu al cabezón, y depués llevantalu coles cinches de goma duro, poro, hai de xirar el rodiellu... él sólu nun puede, lo primero, que cásique nun alcanza, agora yá tien unes palanques llargues de fierro, poro, tien de ponese nel bancu fechu pa esi fin y meteles nel furacu, tirar y que fagan xirar el rodiellu, ¡Ai, esti güe! que debe pesar cásique una tonelada. Dase la vuelta y mira pa los paisanos, que tán enfrascaos charrando, pa que-y echen una mano. 

-Pepe, garra esta palanca, aídame a xubir el güe. 

Avérense tres paisanos y  Manolo mirando ensin nada na mano, dirixe la maniobra y fixa’l rodiellu cola palanca más curtia. Avera’l caxón  de la ferramienta mientres el güe espatexa, colos preseos bien dispuestos, el cuchiellu ferrador, escufina,  teñaces, puxante, martiellu... Depués d’amarrar bien la pata del güe al caballete coles correes, principia’l trabayu, lo primero, separa les pezuñes col mangu del martiellu pequeñu. Manolo ta bastante dobláu, nin falta tien d’agachase, el mandil de cueru arrástra-y pel suelu. Si-y entruguen dalgo, pa falar, nun puede ponese derechu, con xirar el piscuezu tien bastante.

Otru día más que Manolo, de los de casa, llevantóse sólu, nun ye día d’escuela, y los fíos y la muyer quedaren na cama, qué va facer, son los señorinos de la casa y del pueblu. Manolo col so cuerpu firíu pel trabayu, y esi reuma dende mozu, que lu dexó dobláu, deslomáu... fervinchos y remedios caseros pal so dolor de güesos y la indición que tien de comprar cuando nun puede más polos sos dolores, qu’a veces, nun lu dexa  trabayar.  Trabayu abondo na so fragua, pa ganase la vida d’artesanu del fierro, ferradures, calderos, hasta candiles y carburos tien fecho, emperu  agora, calzar hachos y fesories, facer ganchos, fierros de cabruñar  y foces, y hasta iguar con un clavu, calderos y potes, ye lo que-y ocupa’l tiempu. Les trébedes que tien feches, roñoses, yá nun hai quién-y les compre.

Cavilando, dobláu comu ta, ensin atender les charres de los clientes, dase cuenta que ta ellí ta Pepín, mirando ensin perder detalles, Pepín quier más mirar qu’escuchar alderiques de mayores. Avérase a Manolo, prudente, con mieu a molestar, 

- Oye Manolo, ¿Daráte tiempu ferrar el burru güei? Manolo xira’l piscuezu y mira al rapaz con cara  de tenrura. Pepín ye un rapaz de les families más humildes y meyores del pueblu, tán de caseros. 

– Pepín, llegasti de los últimos, va ser yá tardiquina, valte más dir pa casa y venir pela tardi cuando vaya baxando’l sol, nun vas tar ensin comer tol día.

 – Manolo,  traxi la comida. 

 – Bueno, si quies esperar, va ser cásique tol día.

Pepín, tendrá unos 12 años, vive na casería colos padres alloñáu del pueblu y fai sofitu en casa, enantes de dir a la escuela pela mañana, pel branu, baxa la lleche pal pueblu, los llecheros ellí nun van a buscala, depués, lleva la comida a la escuela pa nun andar tantu al meudía, nuna espuerta, la mesma que traxo güei, cola fiambrera, pan, y una botellina de lleche, lo mesmo que lleva cuando va a la escuela.

– Si quies comer equí, calentámoste la comida.

Pepín prefier pasar ellí tol día, atiende, deprende, y cuando se llevanten los ñeños, anque son mayores qu’él, xuega y ta con éllos, pa esti día tien un plan bien diferente.

Manolo yá cambia y pon l’otru güe nel potru, pide sofitu. Al carreteru yá-y dura, anque yá-y queda pocu, tien de dir pal monte. Manolo,  ferrando estos gües nun gasta bona cara, el carreteru apura y siempres tien de ser el primeru.

Esti día nun ye completu, Manolo t’apuráu y ansiosu, xente abondo, voces, discutinios, rises, hasta riñes, comu si se xugaren les perres, anque tamién hai apuestes, dos mozos tán echando una partía a la birla. Too mecíu cola radio al altu la lleva que tien prendía, Manolo, depués d’un tiempu cola la lluz en casa y na fragua, mercó dos radios, ún pa ponelu na fragua y sintir les noticies y música  mentantu trabaya. 

Ellí ta Pepín, ente’l trabayu del ferrador, que-y presta velo, los porfíos y alderiques de los paisanos y sintir la radio, ye l’únicu sitiu onde la oye, nun s’aburre, anque tien gana que baxen los ñeños. Yá tán nes noticies del parte de les 12, Manolo, óyeles comu si cantara un carru, pa Pepín ye una novedá sintir la radio. Una noticia nun-y cayó al suelu.

Atentu a les noticies de la radio, siénteles nun lleguaxe que namás siente na escuela, peru al sintiles ellí, paez-y qu’esnala comu cuando-y cunten un cuentu, piensa... dende ónde lo cuenten, aquella música que ponen... emociónase. Esa sensación, sorpresa y confusión, llévalu a ver imáxenes pa construyir la so realidá. Noticies que nun espera, nin sabe que pueden dase, influi nel estáu d’ánimu, coles duldes, cavilga si son cuentos o ye hestoria real d’un mundu imaxinariu que ta ehí.

Qué atención prestó a esta noticia d’Alemania, na que punxo tol conocimientu.

“En las elecciones federales celebradas el 17 de septiembre de 1961 en Alemania Occidental, la coalición Unión Demócrata Cristiana y Unión Social Cristiana, liderada por el canciller Konrad Adenauer, obtuvo una nueva victoria con el 45.32% de los votos. Aunque la CDU/CSU no alcanzó la mayoría absoluta, logró formar gobierno en coalición con el Partido Democrático Libre. Estas elecciones reflejan un reacomodo político importante, con un avance significativo del Partido Socialdemócrata bajo el diderazgo de Willy Brandt.”

-Tengo d’entrugar una cosa a mio padre, cavilga...

Y sigue llegando xente, dos burros cargaos, ún del madreñeru,   coles alforxes enllenes de madreñes qu’anda repartiendo pelos chigres-tienda de les aldees, y l’otru, un burru col apareyu de madera bien armáu, los cántaros, xarros y cazueles  de barru cocíu bien colocáu y protexíu con paya. Esti vendedor alfareru diz, que por favor, que-y ponga una ferradura al burru, cayó la que tenía, rompió’l cascu y acoxa. Diz-y Manolo que tien de ponese na la fila.

L'alfareru cunta, que lleva doce díes caleyando tol día dende la comarca de Aliste, Zamora, vendiendo pelos pueblos de Lleón, l’últimu Babia y llegó a Asturies baxando pel  puertu Ventana y la nueche pasada tebo de dormir nun llavaderu d’una aldea averáu a Teberga y ta  vendiendo peles aldees más separtaes de les cuidaes. Equí pel centru d’Asturies ye onde meyor vende. Quéxase, fai per ser candial y que-y ponga al burru la ferradura, namás una. Manolo cola boca pequeña diz-y qu’espere al meudía, cuando toos marchen a comer, pierde del tiempu dél y que nun momentu fai’l llabor, que nun descargue’l burru. L’alfareru agradecíu da-y a escoyer, -¿Qué te dejo, un botijo, o quieres más un cántaro o una cazuela?. Manolo llama a la muyer. La muyer yá sabía qu’andaba perhí Pepín xugando colos sos rapaces, que güei tán tirando la pata, nun pel tirador del fuelle aidando a so padre na fragua; la madre báxa-y a Pepín media onza chicolate y pídi-y la espuerta pa calentar la fiambrera. La muyer mira los cacharros, y escueye una puchera pequeña cola tapa decorada.

Na casa del monte yá-yos duraba, Pepín tardaba. El padre decide baxar a buscalu al pueblu y cuando llega a la fragua, Pepín yá taba montáu nel burru y marchaba. Paco’l padre, fala un pocu col ferreru, y los dos dan la vuelta pa casa.

-¿Pepín, qué ficisti tol día? entruga’l padre.

-Xugar colos ñeños y oir la radio, y comí la comida en casa con éllos. Oye papa, dixeron un cosa na radio, que n’Alemania escoyeren un presidente.

-Si, si, n’Alemania escoyen presidente.

-Entós, ¿Quién escoye n’España a Franco? 

Enantes retrucar, Paco cavilga esmolíu, mira p’atrás, pa los llaos, escuca asegurándose que nun los escuchó naide. ¡Qué-y puede dicir a Pepín!

-Pepín, nun entrugues más eso, nin a mín nin en dengún llugar, eso nun se puede entrugar, y mira voi dicítelo, ¿Diote la vuelta de les perres Manolo? mira’l duru y llee. Pepín saca lo sueltu del bolsu y garra un duru con tientu, fixando la mirada na moneda y lleendo altu...

- 5 pts. Francisco Franco Caudillo de España por la gracia de Dios.

-Pos yá lo sabes, nun lo entrugues más, que yá lo teníes de saber. 

Pepín cavilga si se conecta col mundu divinu, garra mieu. 

-Papa, ¿Entós si lo entrugo, va castígame Dios?

-Anda, avérate al sucu, vamos los dos en burru.

Acabóse’l día, Manolo ganó bones perres. Entra en casa y enñérase nún sillón de mimbre comu puede, p’aselar un pocu, nin pudo recoyer los preseos, “mañana mándolo a los ñeños.”. Manda apagar la radio y diz, que nun-y digan nada, y zarrando los güeyos oye’l silenciu rotu pel palpu del coral, esti momentu ye la verdá que precisa, foi quién acabar otru día.