Esti martes, nel salón d'actos del IES de Villaviciosa, va facese la preestrena d'un programa nuevu de TPA sobre la llingua asturiana, Fálame, dedicáu al públicu infantil y xuvenil, anque coles mires de qu'interese a tola familia. L'actu de presentación ta entamáu p'alumnos de primeru y segundu de la ESO (12–14 años), amá de p'alumnos de la escuela de primaria, del cursu de sestu (11-12 años).

L'actu va consistir nuna presentación curtia del espaciu nuevu de la televisión pública asturiana, cuntando cola presencia de la so conductora, la conocida cantante Anabel Santiago. Depués, va facese la proyección d'un capítulu de Fálame. Tres esa proyección, los alumnos van tener ocasión de treslladar la so opinión sobre la esperiencia y sobre el programa nuevu tanto a la mesma Anabel Santiago como a representantes de RTPA y del productor Médula producciones.

Dende RTPA paeznos qu'escuchar a l'audiencia, nesti casu representada por neños y rapazos, yeun elementu clave a la hora de programar conteníos nuevos .

Los protagonistes del programa Fálame, que TPA va estrenar el domingu 21 de mayu, n'horariu de mañana, son escolinos de los cursos de primaria, que cursen l'asignatura d'Asturianu en dellos centros educativos del Principáu. Trátase d'un programa infantil n'asturianu, que se va emitir les fines de selmana, con una duración de trenta minutos y con vocación de llegar a tola familia, de fidelizar a los mayores y a los más pequeños de la casa.

Na primer temporada, y a lo llargo de 26 capítulos, l'espaciu va visitar centros educativos de la nuestra comunidá autónoma. La presentadora, la cantante Anabel Santiago, va participar colos alumnos y alumnes nuna serie de secciones que combinen lo educativo y didáctico colo puramente lúdico. Pa eso va recurrise a parodies de dalgunos de los programes más conocíos de les televisiones xeneralistes, siempres, cola llingua asturiana como protagonista.

Amás, el grupu asturianu “Pop Piquiñín”, alter ego n'asturianu del conxuntu “Petit Pop”, va regalanos pa cada capítulu una interpretación en directo de les sos temes más conocíos.

L'espaciu ta realizáu por TPA en collaboración cola productora asturiana Médula Producciones, responsable, ente otros, de formatos tan populares como Mochileros, De Folixa en Folixa, o Presta Asgaya, l'anterior contenedor de la programación infantil de la Televisión del Principáu d'Asturies.