Esti vienres, 21 d´abril, tuvo llugar la presentación del Primer Concursu de Microrrellatos n´Asturianu convocáu pol IES Víctor García de la Concha de Villaviciosa con motivu de la Selmana de les Lletres Asturianes.

L´actu cellebróse na biblioteca del IES Víctor García de la Concha y a esti acudieron Lorena Villar, teniente alcalde del Ayuntantamientu de Villaviciosa, Lluis Portal, escritor maliayés y miembru de l´asociación cultural Compaña del Rochel, Ana González, secretaria d´ACOSEVI (asociación de comerciantes y servicios de Villaviciosa), y Modesto Álvarez y José Luis Agüera como director y profesor del IES.

Nel actu resaltóse lo novedoso del concursu, empobináu a tol alumnáu de la comunidá educativa de Villaviciosa, incluyendo a los alumnos/es de primaria, secundaria y bachilleratu del IES Víctor García de la Concha, Colexu públicu Maliayo, Colexu San Rafael y el CRA de La Marina.

Tamién tien de novedosu que ta empobináu a los padres y madres del alumnáu, y tamién a tol profesoráu, sacando´l concursu de les llendes de los centros educativos y faciéndolu estensible a tola comunidá educativa.

La intención fundamental ye la d´intentar nun llindar l´usu del asturianu a la clas de llingua asturiana, y d´esta manera fomentar, esparder y normalizar el so usu.

La gran acoyida que ta teniendo esta iniciativa demuéstrase pol númberu d´entidaes o asociaciones collaboradores, qu´aparte de los cuatro centros educativos son: L´Ayuntamientu de Villaviciosa, L´Academia de la Llingua Asturiana, el Serviciu de Normalización Llingüística de la Comarca de la Sidra, les asociaciones culturales Cubera y La Compaña del Ronchel, y ACOSEVI (Asociación de Comerciantes y servicios de Villaviciosa).

El concursu ta vixente dende´l 6 al 30 d´abril. Cada participante pue presentar un solu trabayu, orixinal y escritu n´asturianu, con una estensión de 10 a 20 llinies, 100-200 pallabres. Presentaráse pol sistema de plica y podrá entregase nes conserxeríes de los centros educativos o nos comercios collaboradores d´ACOSEVI.

Esistirán 3 premios por categoría: primaria, secundaria, bachillerato, padres/madres, profesoráu, y éstos entregaránse nun actu que tendrá llugar coincidiendo col pieslle de la Selmana les Lletres Asturianes el 9 de mayu.

EN LA FOTO DE IZQUIERDA A DERECHA: JOSECHU (PROFESOR DEL IES), ANA (REPRESENTANTE DE ACOSEVI), LORENA VILLAR (TENIENTE ALCALDE DEL AYUNTAMIENTO), LLUIS PORTAL (REPRESERNTANTE DEL RONCHEL)  Y MODESTO ALVAREZ (DIRECTOR DEL IES)