Home, nun mos viemos dende setiembre y nun voi dexar nada en papu y vas tener qu´oyime, fai tiempu que nun sé nada de ti y manca, espero tener la oportunidá de pidíte esplicaciones y tu de dame les tos razones. Alcuérdome dellos planes que ficimos y quedaron pendientes pa cuando torne a Madrid. Si, escríbote, nun fai falta que diga´l to nome, namás que lleas un pocu yá sabes que ye pa ti, ún al qu´alcontré nuna cai y del que tuvi la suerte de faceme collaciu, aquél que taba siempre dispuestu y afayaizu y collaciu de los de so, entamamos l´amistá y demostrasti que ties un corazón más grande que tu, regalando xenerosidá y tiempu. Ficisti de guía, ficisti qu´ún siéntase atopadizu na to compañía.

 Asina pasamos díes xuntos dando´l paseín peles cais averaes a to casa y, voi dicítelo, cuantu me prestó la to reacción cuando´l xueves esperéte al salir de misa, prestóte tantu como a min, cola to cara de plasmu y garrándome pel costazu ensin disimulu y pasiando peles cais pa la to casa. Falamos muncho como siempre nos llugares más afayaos onde tuviemos los momentos más íntimos de la nuesa amistá, teníes güeyu pa escoyer los sitios perfeutos onde paez que tabes en paz col mundu y sentaos de frente, onde mirase a los güeyos pa falar yera lo más natural p´amosar l´afinidá.

Pero escaecisti lo principal y manca, porque atristalla´l silenciu y manca nun saber nada, conociéndote, agora nun m´estraña, enxamás quisisti esmolecer a naide, vivisti mirando pa dientro, viviendo la to realidá ensin dicir nada qu´esmoleza a los tuyos. Nun sé si fui yo l´afortunáu o fuisti tu, si sélo, fuimos los dos. Cuando l´afinidá ye tan ñidia nun hai torga p´abrise como lo ficimos nós, la nuesa realidá tan apareyada, coles nueses esperiencies, ilusiones ya histories que compartiemos y dalgunes que taben guardaes nel requexu de la memoria, fasta que nun hebo más. Collaciu, teo que date les gracies por tantu.

 Tantu qu´apurristi como persona y compartir lo más importante de la vida: el to sen p´alministrar los afectos, l´enfotu n´amistá y l´amor polos nuesos. Gracies por tar el día que t´alcontré y sentime afortunáu ensin saber qu´enantes tabes ehí ensin conocete. Gracies por demostrame lo prestosu que ye vivir suaños y vivir namoráu de la to ciudá y nun por ser capital, sinón por ser tuya y, cómo aferrase a la compañía de escribir pa facer frente a la soledá. Gracies por dicime qu´hai que rir, qu´el futuro sedrá lo que tea que ser. Pero deprendí que yes l´home de la sorisa cenciella y de la carcaxada imposible y tamién supi que yá taben paraes les foles na mar de los tos suaños.

Pero escaecisti dicime dalgo y manca, pero voi disculpate, pienso pa min qu´igual nun te dio tiempu. Nun me dixiste que yá nun me esperes más. Dexo que pase l´aire seliquín pente les cañes del to silenciu, mentantu´l golor de la cerveza 00 ñúblame´l recuerdu de la verdá de la vida y sintíme xixiláu dende la to ventana con sentimientu y manca cuando pienso, cuando aliendo, cuando dame l´aire na cara y miro´l cielu buscando la to mirada y el to recuerdu, máncame nun alcontrar nada y mirar pal suelu. El día que mos alcontremos nuna cai del to cielu, daréte una sorisa y la lluz na nuesa cara illuminará l´universu.

   N´ALCORDANZA DEL COLLACIU DE MIO, LUIS. 1936 – 2017.

   XUAN MIYAR